Sopox lawan siyu

(Sasak.org) Jumat, 22 Agustus 2008 01:00

Nenex kaji Sax Kuwase, icanin gamax menge fikiran adexn bau faham ilmu penaox sax baru, lancarang gamax elax kaji aden bau nyampeyang kesejatian dait kowatang gamax aten kaji ngandangin selapux cobe lex idup senixn, amiiin Ya Rabbal Alamiiin.

Marax meno doxe sax terus ite ulang lex julun anak jari adexte pade beriuk tinjang, boyax keselametan olex ilmu penaox sax sejati. Leman kodex dait nane, ite selapuxan kerep bedengah lex pengajian base sopox dengan beduwe ilmu penaox luwih peren tinimbang siyu dengan sax sholeh.
Dengan sax sholeh sanggupn tahan lapah dait bedakn, terus ne sembahyang 75 rekaxat. Sanggupne sumpel idungn adex ngkahne ngambu kakenan maix. Taon kedokang dirixn olex keributan duniye. Nggaxn ye boyax, ketenangan dirixn mesax. Lamun wah lapur lex De Side Nenex Sak Kuwase marax ntan wah bis kewajiban. Ye ampoxn luwex pekare sulit tiwox lex andaran, selapux momot ngantih piran piran jax ilang mesax pekare senuxn, sengax ndex arax dengan taox berembe dait ape sax jari sebab makatn selun selun arax sax marax meno.

Wah te beketuwen lex semeton ulamax pekare beden dengan berilmu sax tehadiahang six De Side Allah pire pire derajat atasne tebanding six dengan ndex berilmu. Jari ape aran sederajat senuxn? Ulamax senux bejawab base sopox derajat artin pade six jarax bumi jox langit tulax keto kete!. Subhanallah……Ampure Nenex kaji Sax Bedue Selapux penaox,ampurayaan…ampurayaan…ampurayaan.

Arax dengan muni, luwexan bawi timbang manuse lex Kulande!. Sopox gumi kocet gati, kire kire 7 kali galuh gumi Sasak. Pendudukn 16 jute dait perkapita 28 iyu dolar. Gumi sempit ndarax kesuburan, gesik dait aix doang sax ambur. Gumi Kulande senux ye bawaxan isix segare sampe minus 6,7 meter BMS (olex bon muwan segare). Ape jax rahasiyen tau Kulande sax kocap jari pribahase Inggris kene: “Tuhan piyax laut dengan Kulande piyax darat”. Sax aran schiphol, galuh gati, ye maux geroang segare anak no. Ye ampoxn bau bangun Bandara sengax ndarax daratan lain. Ino doang 4 meter BMS. Untung bae te icanin si Nenex memontong lex sedin segare. Jari ndexn te pribasax six ombax.

Leman abad 15 tau Kulande bejuang nibu aix, kitiran sax belex belex tepiyax kadu gelontorang aix. Leman pulatan jamax jamax senuxn berubah jari kemajuan peren marax gilingan gandum, minyak dait lain usahe. Nani jax pulatan undak atas te kawih, kitiran asli jax jari turis doang. Kitiran samannani jari penggitax lex lendang lendang, saxngepe baun jual listrik tipax perusahan belex sengax hasil listrikn keluwihan. Lex pedaleman sax paling kurang menuse pengingon sampi idup makmur pade six dengan kote. Timaxn jari tukang ngawis rebu dait meset susu sampi, bembex kadu alat otomatis, lagux ilmun pade six dengan kote. Bilang bale beduwe perpustakaan dait komputer.

Catetante lex Jepang ndexne beda jaox, keduwax wangse senixn pade kemajuan dait disiplin. Sax pedas jax keduwaxn tetu tetu idup sederhane alias jamax jamax. Timax menu arax doang sax lainan six gambaran umum, lagux sax terang ye pade idup sesuai kebutuhan. Akal sehat rate rate jari petokan bilang jelo.

Wah te gitax wangse sax maju maju, arax sopox sax jari catetan yesino, base lex to luwexan dengan berilmu six dengan sax sholeh. Dengan sax berilmu senuxn luwex gati baun gawex jari kemaslahatan manuse. Perajahan senixn sang bau te terapang lex gumi Sasak. Crobaxang te piyax lakaran 20 taon, selapux pepadu Sasak besekole sax bagus tampe ngurangi kesholehan, insyaallah bau te sulap gumi Sasak jari marax Singapur. Aneh beriuk tinjang te sorong bangsen tite adexn ngkah mararix – beseang terus atawe jari budax lex parox dengan.

Ndex narax langan tipax bagiye. Sengax bagiye sino sopox langan. Ndex narax langan tipax kemaxmuran. Sengax kemaxmuran sino sopox langan. Idup sine semule jatine ye pesopox tersena, saras dait beriuk tinjang. Insyaallah!
Wallahualambissawab

Marax meno dait ampure
Sax Ikhlas

Hazairin R. JUNEP

Sasak Bongoh)
Glosarium
Peren – penting
Bedak – haus
Andaran - lingkungan
Pulatan – teknologi
Jamax- sederhana
Undak atas - tingkat tinggi
Samannani – modern
Kulande – Belanda
Saxngepe – pemilik
Pengingon- peternak
Lakaran – rencana, rancangan
Beriuk tinjang – bekerjasama saling mendukung, kerjasama
Tersena- cinta
Saras - harmoni