Jumat, 29 Mei 2009

Sasak dait Kuldi

(Sasak.org) Rabu, 26 Maret 2008 01:00

Lafal bunyi Sasak: [Belex = besar, Beleg = asli, Belek = kaleng, Belek = encer]

Dengan Sasak, wah olex saman laex ye kebut six sifat sifat satrye dait jujur. Lagux begentixne waktu milu gentix sifat sax tepuje six dengan luwex sino. Kemuliaan martabat menuse sax ribuwan taon te ajahang six papux balox selun wah begentix six sifat demen peta mau makkegirangan sax jelap telang marax angin liwat.

Kebiasaan ngotok lex sedin rurung mulai penggitan, leman waktune pade arax sekole SMA. Laexan sax masih cume besekole SD atawe SMP, menusene masak jiwene. Kerna leman kodex tetaletang ajahan base (bahwa) selapux dengan jax gen jari towax dait jax jaux tanggung jawab lex masyarakat.

Bilang kelompok manuse agenne jelap maju harus arax beduwe penuntun sax kowat lamun perlu sax revolusioner. Buroh ndex ne jax bau maju lamun ne bejuang mesax. Dengan bangket ndex ne jax berubah nasibne lamun ne meno meno dirix idupne. Kelompox sino perlu beduwe, buroh sax tulen buroh lagux berilmu, yesino dengan sax taox berembe derite dait kemelen batur luwex. Semeno juax dengan bangket harus ne buduwe sopox dengan sax tetu idup leman bangket lagux berilmu, yesino sax ketaon ape sax jari pendait baturne sax luwex sino.

Lex mbe mbe paer ndarax ceritene, dengan bangket atawe buroh te majuang isix dengan luwar olex bangket atawe luar buroh. Sejarah wah nyatet kejadian revolusi sax tepejulux six buroh atawe dengan bangket. Terus wah sino bau arax kemajuan lex segale bebiris (bidang). Lex Gumi Selaparang sene, rakyatne jelangkar sebangetne jelangkar (sangat terpuruk). Dengan sax tarepang jax jari pengubah ndex arax bekas bekasne mele obah keadaan, ape malik revolusi. Dengan sax mesti geraxang masyarakat agenne maju, malah terus ne rabox sifat sifat lumah dengan luwex adexne sax ndex bau maju. Kembexne ampo meno, sengax dengan luwex, salax dengan, taoxne ngarep adexne sax te tulung lex usahe perobahan sino. Marax te sebut lex julu, dengan sax jax obah kelompok mesti ne leman sopox kelompok. Ndexne bau dengan bangket jax obah buroh ape sebalikne.

Jari dengan luwex mesti sadar nane sene, lamun mele pade maju, harus arax ne jariang sopox sax jari panutan lex dalem kelompok mesax. Lamun wah te siapang kanak bajang lex dalem kelompok terus arax sak kowat barux te sugulang pepadu pepadu kelompok sax lain. Terus tesanding selapuxne, barux te bau manto mbe sax paling bagus ye te majuang jari datu. Datu sino sax tiwox olex dasan atawe kelompok mesax pasti ne kowat dit beduwe sifat satriye, sengax ye te pelihara te tiwoxbelexang, te imenae mesax.

Luwex pinton (contoh) lex kesah kesah saman laex pekare datu datu sax kowat dit te tunang six rakyatne, selapuxne olex dalem kelompox mesax. Raden Wijaye sax butengang Majepahit, Ken Arok sax pekatik jaran terus jari datu sino. Napoleon meno maseh dit luwex sax ndexne bau te sebut selapuxne lex te. Dengan sino ndexne mesti leman wangse menak. Lagux luwexan lex kesah kesah tesebut wangse menak, sengax wangse sino
sax beduwe kemengan ( kpandaian) nyerat kesah. Timax jax ndexne wangse menak lagux tetamang lex kesah jari teparan selapux wangse menak. Kesah sax meno pade wah terjadi lex selapux gumi sene. Masyarakat luwex mesti ne taox base ite sine ndex te mungkin jaxte majuang six dengan lain. Ape malik nane menuse pade beriuk boyax kedemenan, kegirangan mesakx (hedonis). Peniage beriukne majuang pade baturne sax beniage. PNS beriukne pertahanang posisine. Pulitisi sekowatne berusaha adex ndax bae jangke te sugulang olex parte atawe dewan, ye ampoxne pade beriux piyax kelompok adekne kowat. Sax kelimpungan dit pineng kejelo kekelem nggakne yasino buroh, dengan bangket, dagang urap-beberox. Sai jax bela dengan kodex kodex sino, nane sene? Selain dirixne mesax ndarax dengan lain. Ape lacur mayoritas manuse lex Selaparang sino ye dengan kodex.

Sax jari pekare sene, ndarax dengan lain jax bau nuntun jangke pungkas, lamun ndex dengan olex dalem mesax. Lagux ndexne mungkin dengan kodex jax gumane tiwoxbelexang pemimpinne, sengax manuse sax jelangkar sino, ndexne bau mikir lainan kecuwali pekare berembe ntan mangan jelo sene. Ye ampox ne mudax lalox te pengaruhin six oknum tertentu, sengax dengan luwex sino lumah pikirne, lumah pemetaxne dit seterusne.

Nane sene sax tetu teperluang six dengan luwex yesino, kanak bajang sax tiwoxbelex lex masyarakat . Sax tetu beridap berembe sedehne manuse lamun ne ndex beduwe ape ape. Sax wah ngalamin, perajahan lex idup sax nyate. Ye doang sax bau jaux masyarakat jax maju.

Lamun sax lain, pasti ndarax angen sax belex tipax usahe majuang dengan kodex sino, sengax ye ndex ngidap base ye sino dengan sax pade susahne. Tetu ye bejanjix lex kampanye meno mene, dendex jangke percaye. Mustahil dengan lain jax jaux ite maju, ite mesax doang sax bau majuang dirix.

Dengan sax tesebut kiyai otomatis sax ne majuang sax pade kiyaine, dengan sax nyeken kuwase berusahene bau angen dengan six program merakyat (popules), lagux selapuxne wah terbukti, kyai ndexne wah arax selametang manuse sewahne telah mase penjajahan. Penguase lamun te pilex malik jax ngokot harte seke belex adexne seke sugi mesax. Jari
semeton pade kesulitan jax boyax datune, sengax ndex arax ye pade tiwoxbelexang pepadu sax jax tejariang datu. Selun selun dengan sax ndex wah milu kepansan, kujanan maju mele jari datu.

Rakyat sene, sebelo belon sejarah cume tepolox olox doang. Lagux six kontex ingetan menuse, malik bae ne tulak tipax taoxne gerix. Ye ampoxne arax pesaje (pepatah), base menuse sino ya begean six kuldi (keledai) sengax kuldi sino ndexne wah kedampes duwe reban lex sopox taox, lagux menuse ye kedampes kedampes dirix jangke pecok, lagux
ndexne wah berajah sax tetu tetu berajah. Lamun datu kedampes, rakyat jax berampes, lamun selapux berampes ye ampox te jari apes.

Nenex kaji sak kuwase doang sak epen penaox,

Selamet dait ampure,
Sax ikhlas

Hazairin R. JUNEP

Tidak ada komentar: