Slamet dait Rahayu

(Sasak.org) Minggu, 30 Maret 2008 01:00

Sengeh tanax bangket sax mulai gero, kanak kanak bekendole
Tebango keketak kelep ojok per baret boyax telage sax embung
Awun putex awang belau, jelo benah seken anget aten dengan matax
Lex bebalex inax mogkax nasi pare bulu meriap jari semeton luwex

Lelakax ate bungah bedoxe tipax Nenex Sax Kuwase
Ndex arax bis rase selamet lex De side sax beng rezeki sabol belumbung
Kokok penox six empax, reban begelanyat udang dait kerujux
Ape sax kurang lex gumi sine, ape juax dateng mesax wahte sax begawean pasu

Gowah gati idap berembok, semeton jari lapang pemetax
Selapux tetalet tiwox mesax, karing te matax dait te mongkax
Kemanukan milu beriux mangan, balang begerundaan jelontak
Jangke tedes gigoh angkut pare sax becer lex eles tanak

Bilang dengan bedait kemos dait besalam, rahayu selapuxde
Lex gumi Selaparang ambur pangan dait kakenan, ngonong, kekelep ape lampax
Pire pire dengan mele ndarax jax batesang, pekare pantes ape ndex
Sino ye buax selamet lex De Side Nenex, sax ndex jax bis seterusne.

O Nenex kaji sax kuase, nugrehe, icanin terune dit dedare
Sax jax terusang lime pekare landes borek rahayu sax letne
Jaox langan bai balox lupax ilmu dait agame, ajahan Junjungan tite
Lex gumi Lombox aten manuse, lempeng langan ne, rahayu nurge.

Jogjakarta

Hazairin R. JUNEP

Glosarium
1.borek – jaminan
2. rehayu –selamat sejahtera
3.selamet – terima kasih, syukur