Agame dait Tuhan Sasak

(Sasak.org) Selasa, 25 Maret 2008 01:00

Manuse te icanin penaox dait ase sax ndex ne bau te palex six mahluk De Side Nenex sax lain. Gegawexan (kreatifitas) menuse bau te paran tampe wates, upame ndarax petitox elex agame Islam, wah laex lane dengan Sasak jari semele mele.

Lex dalem idup kance dengan luwex (bermasyarakat), bilang gubuk beduwe adat dait hukum. Semule jatine selapux adat dait hukum sax te kawih ndexne kanggo beradu six hukum agame Islam sino, sengax ite idup lex gumi Sasak sax Islami.

Leman saman halal lepang, sax aran tau Sasax sino, lamun ndex ne bekejengil ndexne bagiye atene pade. Jari meno, bilang gubuk dasan beduwe upakare segale rue agen ne pade demen dit girang idupne. Sekedix sekedix boyax kedemenan terus pekedekan kanak kodex te piyax jari pantowan dengan luwex. Lamun wah ketagian seken bangetang bagian pekedekan sax paling te girangang six batur luwex.

Latehan rage, sax semule jati kawih ngelateh prajurit adexne tetep siage, kadu jari pekedekan terus jari pantowan. Lamun pekedekan sino ndexne jax jari pekare sax nyenyedax karakter manuse, wah tetu ndax tegugat. Lagux keluwex pekare sax te anggep ndex baye semule jatine ye baye gati.

Perisean sax jari olah rage bagus, bau ne jariang ritual, upame lex Bayan, dengan ngingetang Mulud pasti ne araxang perisean sino. Dengan luwex muni, lamun arax sax bocor ye tanden bagus, ye tande nazarne wah teterimax. Dengan luwex sax belok ajum sino, sejatine ndexne taox pekare kemaslahatan dait kemudaratan ape sax ne gawex, ape malik pekare agame. Olah rage sino bagus, sengax te surux ite six Nabi SAW agen te jari ummat sax kowat, digdaye dait taat. Lagux segale ape jax te gawex begantung lex niat. Niat sino pade six Visi. Lamun beduwe visi salax otomatis misine endah salax dengan.

Mulud sino te araxang jari pemberajahan tipax dengan luwex. Berembe landesan agame Islam, berembe idup Rasul SAW sax mesti jari penuntun (role model) tite sax jari ummat sene. Ape ruen urusanne Mulud kance sembex dait minyax blonyoh segale rue. Tetu ndex care langsung ne sedax keimanan tite, lagux seke suwe seke begetax pemahaman dengan base (bahwa) ape sax ne gawex sino ye mula ajaran Nabi. Seken kurang penerangan agame seken kowat pengertian sax salax.

Lamun te bekelit muni, dengan sino kan waktu telu, ino tesebut apologi. Da’i dait da’iyah langsung kekapak kalah. Ndarax bani bebadax pekare sax jari landesan agame sino. Kembex ne arax bede masyarakat, pedahal menuse pade derajatne lex Islam. Kembexne dengan tertentu doang sax beribadah, selain sino ndexne lakonang ajahan agamene. Akah care sino bau te palex tipax Brahamnisme, coba ketowan dengan Hindu sax deket balende, wahne gitax kitab sucine ape ndex?. Pasti ne ngengget, sengax cume wangsen Brahman sax kanggo nenaox. Sax lain tesebut kaste bawaxan ndexne ketaon ape ape. Ape malix sax tesebux kaum Paria sino, o marax sesato jamax, haram ne te demok six kaste sax atasan.

Islam sino Rahmatan lil Alamin, arax sopox sax te tegel yesino Al Qur’an dait Hadits. Lamun ndex te faham pekare sax sulit serahang lex Allah dit RasulNe. Nah sino sax perlu gati te gores bawaxin, ape juwax pekare lamun ndexte ngerti tulakang tipax De Side Nenex dit Nabi SAW. Ye ampox te maux perentah Iqra’ sino, adexte mace, ape beketowan perkare sax ndexte taox. Ngkahte jari pengikut dengan sax taoxte beketowan, ino tearan kultus individu, atawe nyembah manuse. Ite Iqra’ sino watesne entah mace, mbedayang dit ngerti. Tetep te berentix lex Tali Allah, tampe te ilang rase hormat te lex dengan sax taoxte beguru sino.

Lamun te beniat ngerayang Mulud semestine ite beriuk tulak jok ajaran Nabi SAW sino. Ngkah te arax araxang upekare sax ndex ne arax tuntunan lex Qur”an dait hadits. Paling jaox te kanggo gawex ape juwex watesne bermanfaat ndex sax jax jaux mudarat tipe selapux dengan.

Lex mase sine, dengan Sasak wah bekeleot bekelecang pade beragame, arax sax nyampur Islam six Hindu, bekerem, bekipu, betape, nyembah lex batu dit lain lain. Arax sax nyampur Islam six Kresten dit Yahudi, jari seken dengan pineng isixne. Luwex ndah sax jari ateis, sengax selun selun gedeg atene gitax dengan sembayang, teparan dengan sembayang sino takut lex Allah sax jax murke lamun ndexne sembayang. Tretet tetet…Ongkat sopox Tuan Guru laex. Ye ruen ampox meno ongkatne, kaye, Tuan Guru sino, keluwex dengan sax selun selun jari tuhan lex gumi Selaparang.

Arax sax merkosa anakne jangke nganak, sengax ye anggep dirixne tuhan, arax sax korupsi kerna ye anggep dirixne tuhan. Lex embe juax arax tuhan kodex dit belex. Babu te pelaux pedayax six tuan ne kerna ye milu mangan lex taoxne, jari ye tuhan. Cobaxang lalo jok pulisi, ape kantor bupati, pasti begelanyat tuhan lex mbe mbe, harus ne nyembah atawa ne toloxang sesajen baruxne bau liwat.

Agamen dengan Sasak berue rue endah, Pegawe Negeri, Karyawan, Parte, kelompok pengajian, komunitas dait bau endah kesebelasan beraduwan jari agame. Ritualne lain lain, arax sax bilang setaon duwe ne ribut. Taek pangket aranne ape malix jax pensiun persis marax ngurus ibadah haji. Karyawan nyembah lex bos, bilang bulan arax ritual atau bilang taon. Parte sino meno maseh, rapat parte marax sembayang 5 waktu, olex kelemax dait kekelem ndexne tutux marax dengan gile zikir. Kampanye bau te paran ye nyeken kumpul lex Arafah.

Selapux keleot kelecang sino, mulain olex lakarjari (rekayasa) kelompok tertentu sax mele nguwasain kelompok lain. Seke suwe ndarax bau kendaliang ye, jari nane selapux dengan beriux pade gawex pekare sax pade, marax entan wah te ajah six Tuan Guru mesax mesax. Bilang dengan beduwe aturan dait anggote. Selun selun, ndex te kenal semeton jarinte mesax six keluwex adab dait care sax endex endex.

Kejarian sax arax lex Gumi Selaparang, upame Kekerasan Dalam Rumah Tangga, ndarax urusanne dait Agame Islam. Maling, copet, aborsi ape malik. Lamun te pedasang pacu pacu, pekare sax nyedax bangsen tite sino, landesanne yesino njelangkarne idup (keterpurukan). Moral seda, hukum ndex t’ajin, tradisi te gentix six upekare kegirangan (hedonis). Terus terusan sekedix sekedix selun selun selapux beduwe agame mesax dait tuhan mesax. Piran piran jax ne arax perang selak (antara) tuhan dait tuhan. Lamun jangke terjadi sax meno, ye wah wayen kehancuran bangse Sasax…

Nenex kaji sak kuwase doang sax paling taox,

Selamet dait ampure,
Sax ikhlas,

Hazairin R. JUNEP