Rombox Cahye

Senin, 24 Maret 2008 01:00

Lex sopox jelo sax jax ne bis lex idup penyaer Jerman, Goethe (1749-1832), maux ye muni sax penutux gati. Ongkat ne:” Mehr Licht!”. Lamun te base Sasakang ongkat sine bau ye kene : Romboxan ite cahye!”. Ye mele te beng dile ape lilin sax luwexan, wayah sene. Atawe te bukaang ye jendele adekne seke terang?

Kendaitan (ternyata) ye, ndex ne mele sinar lilin ape dilah, lagu lain gati citene. Sax jari melexne seno adexte beriuk romboxan pemengan akal (penjelasan intelektual), adexte romboxang penaox dait kesejatian.

Lex mase ne idup Goethe, ye wah gitax kebingisan manuse sax saling petiglang, sax kowat merentah sax lemah. Napoleon te kalahang six Enggris dit Sulingen atawe Prusia (Jerman). Terus bae menuse saling kaken, lengan sino peradaban seken ndex keruan ruene. Ye ampoxne meno ongkat Geothe parekne sax jax tilar.

Cahye sino tandox upame ilmu penaox. Jari lamun seke luwex dengan berilmu seken benah gumi. Lex dalem ajaran Islam arax pesen pekare sax luwih utame sekex manuse berilmu timbang siyu dengan sembayang. Meno entan Islam sax luwar biase ngajin ilmu. Lagux berembe jage tadahne, seken kurang doang menuse Sasak sax boyax ilmu. Tetu masjid penox jangke siyu lex sopox kote doang. Lagux luwexan dengan nunduk nungkex doang. Wah inggas besembayang ibarat mangan lex warung, bilin taisne piring selapux sax gemi wahne sax bayah. Ndarax lio kiri, kawan, julu, mudi. Ino sopox tandox dengan nglakonang ape juax tampe ilmu penaox pekare sax ne gawex.

Ape sax te sebut lex Berajah Jejati (Quantum Learning), berajah yesino,”interactions that transform energy into radiance”. Watesan (definisi) sino tebait olex rumus E=mc2 dowen Tuan Guru Einstein. Kire kire base Sasakne : berajah yesino tepade saling badax ajah adexne bau tewujutang enersi jari cahye. Tuan Guru Einstein sino dengan Yahudi, lagux ke solah ongkatne pekare ilmu dait agame. Ngene ongkatne:” Agame tampe ilmu kepax, Ilmu tampe agame pekek”.

Berajah semule jatine yesino tuntunan lex dalem usahe pewujutan sifat (karakter). Karakter asalne olex base Latin sax bemaxne pahat. Jari usahe ngewujutang karakter yesino te ngukir jiwa adexne bau jari wujut sax ruenmesax (unik), tedemenang (menarik) dait ndexne pade six baturne.

Berembe carente yax ngukir barang sax ndex bewujut sino? Pekare mudax, ape jax sax bewujut?. Kan wah beduwen te Agame Islam, sax mule jatine beduwe ajaran sax ndex bewujut ndah. Ye te kadu ngukir. Panutan sejati (role model) tetu tetu te perluang lex usahe sene. Ndex ne kanggo sekedar CCD (cucuk cucuk doang) alias teori. Lagux sai bani ngeraos ye mesax mesti ne gawex. Dalem Islam syarat jari Muslim marax basen Nabi SAW arax sopox, yesino ndex te kanggo lekak!.

Kembexne nane sine rue ruen jax Bangse Sasak jari bangse Indlander, ndex sadux dirix, ndexne arax ketempo kemajuan, selain dengan besiax jari selingan maling, ye luwexan dengan beseang. Lagux masi doang dengan demen pade merarix, datu endah demenne maux pajek jari ape sax jari deriten tite ye jari bati belex tipax dengan lain. Pekare ine sugul terus sengax ndarax panutan sejati atau role model.

Selapux kanak tekirim besekole, olex SD sampex S1, S2 malah luwex S3. Lagux cerobax pade te pedasang pacu pacu. Luwexan kanak sino, berajah marax latihan rage. Ndarax gumane berajah sampixne ngukir diri. Nggaxne palexne nilai olex pengajarne. Pegajarne muni ape, lemax murid tesurux muni marax meno lex ujian, jari ape bedan six beo meno?

Lamun wah pade tutux besekole, beriukne boyax pegawean adexne maux kepeng sebelex belexne. Sengax wah sesuai dait lelampan idupne waktune berajah seno. Waktune berajah ye pade ngerasax marax nyeken beli ilmu, marax dengan telateh tinju, bayahne mahal sengax lamun jari juare yaxne maux kepeng belex. Arax sopox Hakim Agung Amerika sax muni, pikiran dit berajah sino pade sik otot dit awak, pade bau te jual beli. Lagux nggax nggaxne sax ndex ne bau te jual beliang ye sino KARAKTER.

Pire dengan sax te paran pinter, ndexne kowat atene begawean, ye sugul tame doang lex mbe juax taoxne. Pire dengan te angkat jari datu, ye kurang dirix six ne beridap. Ye ampoxne pade girang korupsi. Sengax ye paran lamun luwex harte berue bale bagus mobil mewah, barang barang sino bau ne kadu angkat derajatne adekne te ajin six dengan luwex. Bareh julux, wah keluwex dengan kekapax rebax wahne sax bis jabatanne? Pire dengan wah sax te pecat, pedahal gelar ne bederek ngiring aran ne mulai olex Kyai, Haji, Tuan Guru, Raden, Lalu, titel akademis maux beli atau honoraris, pade jelungkur. Arax sopox sax ne pade lupax, ilmu sino lamun tetu te boyax, terus teukir lex dalem pikiran sak wujutang karakter sejati manusie, selapuxne yax berubah jari cahye.

Ngkahang wah besekole lamun pade boyax barang sax bau te jual beli. Araxan ndot lex bale, kadu keping sekole sino jari modal. Nendak empax melong ape cumix, geroang terus jual lex Sweta. Jelapan maux keping kadu beli mobil, rezeki halal dait bagus. Ndarax korupsi ndarax dengan jelungkur selun selun. Lagux sax tetu besekole kerna ngelakonang perintah De Side Allah dait RasulNe, terus jaux pahat dait ukir diri, terus ukir selapux kanak bangse Sasak adexne pade jari manusie sejati, sax sembahyang kerne taoxne ape ne gawex. Bangse Sasak mesti ne dait julux jati dirixne, adekne jari Bangse Merdeke. Atene ikhlas, penaoxne gowar, ibadahne belo, amal sholehne bemanfaat, ino selapuxne jari dilah sax terang benderang lex Gumi Selaparang.
Mule Nenex kaji Sak Kuwase epen selapux penaox

Marax meno julux,

Selamet dait ampure,
Sax Ikhlas,

Hazairin R. JUNEP

(masi bedilah jamplung)