Pepadu Sasak Lebung

(Sasak.org) Sabtu, 12 Juli 2008 01:00

Sopox jelo,galeng-galeng, bebajang Sasak perebax awakne lex geres sedin segare, pemalesne ye tanjukkang lex julune. Maix gati idap hawe laut dait cahye jelo sax anget lex awakne. Tetu nikmat rasen ngantih empax mangan pancing.

Ndex suwe wah sino, dateng sopox peniage sax ndot lex komplex sedin segare mewah sax lampax-lampax boyax angin ilangang pekare sengge lex pegawean. Dengan sino medasang pepadu sax maix gati nungke nyangox andang segare. Langsung ne bejulu rapetan dait beketowan, kembexne ndex begawean sax pacua dait keras adexn bau beang anakjarin keping sax luwex. “Meton, berembe side jax maux empax luwex lamun mene entan begawean?” ongkat peniage sino nyambung. “Araxan de begawean timbang de tindux-tindox lex ite”.

Bebajang sino, ngengat, masine tungke nyangoxne, kemosne dait muniye: “Terus ape untungne lamun ku begawean keras aneh?”.

“Yaox, side kan jax maux empax luwexan, kan”.

“Terus ape untungne malik?” peketowanne sampix kemos-kemos.

“Side jax maux luwex keping, terus de beli kapalsax luwexan hasilde bau empax”

“Terus ape untungne malik?”

Peniage sukses sino mulaine panas atene, tampe ye six peketowanan bajang sax marax dengan ace sino.
“Side bau beli kapal sax belek dait nyewe pire pire dengan begawean” ongkatne.

“Terus ape malik untungne” beketowan bajang sino malik.

Peniage sekex sino mulaine gedeg:” Ka bongohm jari tau! Side bau piyax armade kapal nelayan sax belex, seneng-seneng bekedek keliling duniye, merentah anak buahm bau empax”.

Dasar bajang Sasak Lebung malikne tulak beketowan,: Jari ape malik untungne?”.

Peniage senu mulaine gegedekan, abang muwene, terusne sorakin bajang sino, ” Bodo gati sidene! Side jax jari sugih terus endexm perlu begawean malik! Bisang selapux idupm tokol-tokol santai lex sedin segare sine. Side ndex jax perlu malik peduli lex urusan duniye sene!”.

Bebajang sino kemos terus ne angkat muwene sekedik, tampe uras, muniye,” Jari, menurut side ape jax sax nyengkengku gawex nani seni?”.

Wallahualam bissawab

Marax meno dait ampure,
Sax ikhlas,

Hazairin R. JUNEP